Category Archives: Kottayam Feed Subscription

• ചെങ്ങന്നൂര്‍ സ്വദേശി ദുബായിയില്‍ നീന്തല്‍ക്കുലത്തില്‍ മരിച്ചു

  reporter August 11, 2018

  ചെങ്ങന്നൂര്‍: ചെറിയനാട് നാക്കോലയ്ക്കല്‍ ഉരുളിപ്പുറത്ത് മെല്‍വിന്‍ ഭവനത്തില്‍ മാത്യു ഏബ്രഹാമിന്റെയും വത്സമ്മ മാത്യുവിന്റെയും മകന്‍ മെല്‍വിന്‍ മാത്യു (28) ദുബായില്‍ മരിച്ചതായി ബന്ധുക്കള്‍ക്കു വിവരം ലഭിച്ചു. നീന്തല്‍ക്കുളത്തില്‍ നീന്തുമ്‌ബോള്‍ ദേഹാസ്വാസ്ഥ്യം ഉണ്ടായതിനെ തുടര്‍ന്നാണ് മരിച്ചതെന്നാണ് ബന്ധുക്കള്‍ക്ക് ലഭിച്ച വിവരം.

  ദുബായ് അല്‍ ഫുടൈം കമ്ബനി ഐടി വിഭാഗം ജീവനക്കാരനാണ്. ഭാര്യ: പുലിയൂര്‍ മാടപ്പള്ളില്‍ നിഷ. സഹോദരന്‍: വിമല്‍ മാത്യു. സംസ്‌കാരം പിന്നീട്.

• മുന്‍ സിപിഎം നേതാവ് വി.ആര്‍ ഭാസ്‌കരന്‍ അന്തരിച്ചു

  reporter August 9, 2018

  കോട്ടയം: സിപിഎം മുന്‍ സംസ്ഥാന കമ്മിറ്റി അംഗവും സിഐടിയു മുന്‍ സംസ്ഥാന വൈസ് പ്രസിഡന്റുമായ വി.ആര്‍ ഭാസ്‌കരന്‍(94) അന്തരിച്ചു. രാവിലെ ചങ്ങനാശേരി ചെത്തിപ്പുഴ ആശുപത്രിയിലായിരുന്നു അന്ത്യം. വാര്‍ദ്ധക്യസഹജമായ അസുഖം മൂലം ചികിത്സയിലായിരുന്നു.

  ദിര്‍ഘകാലം സിഐടിയു കോട്ടയം ജില്ലാ പ്രസിഡന്റായിരുന്നു. സിപിഎമ്മിന്റെ ആദ്യകാല സംഘാടകനും നേതാവും മികച്ച ട്രേഡ് യൂണിയന്‍ പ്രവര്‍ത്തകനുമായിരുന്നു അദ്ദേഹം. രണ്ടുപതിറ്റാണ്ടോളം സിഐടിയു ജില്ലാ സെക്രട്ടറി ആയും എല്‍ഡിഎഫിന്റെ കോട്ടയം ജില്ലാ കണ്‍വീനറായും സേവനമനുഷ്ഠിച്ചിട്ടുള്ള അദ്ദേഹം ദീര്‍ഘകാലം സിപിഎം സംസ്ഥാന കമ്മിറ്റി അംഗവുമായിരുന്നു.

  അടിയന്തരാവസ്ഥക്കാലത്ത് അറസ്റ്റ് ചെയ്തു ജയിലടക്കപ്പെട്ട അദ്ദേഹം പരോളിന് ശ്രമിക്കാതെ അടിയന്തരാവസ്ഥ കഴിയുന്നതുവരെ ജയിലില്‍ കഴിഞ്ഞു. അടിയന്തരാവസ്ഥ പ്രഖ്യാപിച്ച് ഒരുമാസം തികഞ്ഞപ്പോഴാണ് അദ്ദേഹത്തെ അറസ്റ്റ് ചെയ്തത്. ചങ്ങനാശ്ശേരി പാര്‍ട്ടി ഓഫിസിലായിരുന്നു അദ്ദേഹം.സഖാക്കള്‍ക്കൊപ്പം അദ്ദേഹത്തെയും അറസ്റ്റ് ചെയ്തുകൊണ്ടുപോയി. ജയിലില്‍ ക്രൂരമായ പീഡനങ്ങളാണ് അദ്ദേഹത്തിന് ഏറ്റുവാങ്ങേണ്ടിവന്നത്. കൂടെ അറസ്റ്റ് ചെയ്ത പലരും പരോളിന് പുറത്തിറങ്ങി. എന്നാല്‍ അദ്ദേഹം പരോളിന് ശ്രമിച്ചില്ല. അടിയന്തരാവസ്ഥ കഴിയുന്നതുവരെ ജയിലില്‍ കഴിഞ്ഞു. കോട്ടയം ജില്ലയിലെ അക്കാലത്തെ പ്രമുഖ നേതാക്കളായിരുന്ന അവറാച്ചന്‍, കെ.കെ ജോസഫ് എന്നിവരോടൊപ്പമാണ് അദ്ദേഹത്തെയും അറസ്റ്റ് ചെയ്തത്.

  പാര്‍ട്ടി ഓഫിസായിരുന്നു അദ്ദേഹത്തിന്റെ വീട്. പ്രത്യയശാസ്ത്രവും സാമൂഹ്യ സേവനവും കൈവിടാതെ കാത്തുസൂക്ഷിച്ച കമ്മ്യൂണിസ്റ്റ്. കോട്ടയം ജില്ലയില്‍ പാര്‍ട്ടിയെ വളര്‍ത്തുന്നതില്‍ കൈമെയ് മറന്നു പ്രവര്‍ത്തിച്ച നേതാവാണ് അദ്ദേഹം മുന്‍ എംഎല്‍എയും സിപിഎം കോട്ടയം ജില്ലാ സെക്രട്ടറിയുമായ വി.എന്‍ വാസവന്‍ സമകാലിക മലയാളത്തോട് പറഞ്ഞു.

• നാലു വര്‍ഷം മുന്‍പ് മരിച്ചവരുടെ പേരില്‍ ഇപ്പോഴും റേഷന്‍ നല്‍കുന്നു

  reporter July 30, 2018

  കോട്ടയം: സംസ്ഥാനത്ത് മരിച്ചവരും റേഷന്‍ വാങ്ങുന്നുവെന്ന് റിപ്പോര്‍ട്ട്. നാലു വര്‍ഷം മുന്‍പു മരിച്ചവരുടെ പേരില്‍ ഇപ്പോഴും റേഷന്‍ വിഹിതം വാങ്ങുന്നുവെന്ന് പൊതുവിതരണ വകുപ്പിന്റെ കണ്ടെത്തല്‍. ഇതേ തുടര്‍ന്നു ഗുണഭോക്താക്കളുടെ പട്ടികയില്‍ അടിയന്തരമായി തിരുത്തലുകള്‍ വരുത്തി റിപ്പോര്‍ട്ട് സമര്‍പ്പിക്കാന്‍ സിവില്‍ സപ്ലൈസ് ഡയറക്ടേറ്റ് എല്ലാ ജില്ലാ സപ്ലൈ ഓഫിസര്‍മാരോടും നിര്‍ദേശിച്ചു.

  ഓണത്തിനു മുന്‍പു രണ്ടു ലക്ഷം മുന്‍ഗണനാ കാര്‍ഡുകള്‍ കൂടി വിതരണം ചെയ്യുന്നതിനു മുന്നോടിയായാണു നടപടി. 2014നു ശേഷം പട്ടിക പുതുക്കാതിരുന്നതാണ് ഈ പ്രശനത്തിന് കാരണം.മുന്‍ഗണനാ കാര്‍ഡുകള്‍ സര്‍ക്കാര്‍ ഉദ്യോഗസ്ഥരും ഉയര്‍ന്ന വരുമാനമുള്ളവരും അടക്കം കൈവശം വച്ചിട്ടുണ്ടെന്നു സപ്ലൈ വകുപ്പു കണ്ടെത്തിയിരുന്നു.
  ഗുണഭോക്താവ് മരിച്ചെന്ന വിവരം മറച്ചുവച്ചും ഇപോസ് മെഷീനില്‍ വിരല്‍ അടയാളം പതിപ്പിക്കാതെ റേഷന്‍ വാങ്ങാനുള്ള സംവിധാനം ദുരുപയോഗപ്പെടുത്തിയും പരേതരുടെ പേരില്‍ ചിലര്‍ സാധനങ്ങള്‍ തിരിമറി നടത്തുന്നുണ്ടെന്നും ഇതു പരിഹരിക്കാന്‍ ശക്തമായ നടപടിയെടുക്കണമെന്നുമാണു ഡയറക്ടറേറ്റിന്റെ നിര്‍ദേശം.

  റേഷന്‍ കാര്‍ഡില്‍ ഇത്തരത്തിലുള്ള തിരിമറികള്‍ നടത്തുന്നവര്‍ക്കെതിരെ നിയമനടപടി ഉണ്ടാകും. വഞ്ചനാക്കുറ്റം, വ്യാജപ്രമാണം ചമയ്ക്കല്‍ തുടങ്ങിയ വകുപ്പുകളാകും ചുമത്തുക. കുറ്റം തെളിഞ്ഞാല്‍ ഏഴു വര്‍ഷം തടവു ശിക്ഷ കിട്ടാം.

• മറവി വിനയായി: മോഷണശേഷം സഞ്ചി എടുക്കാന്‍ മറന്ന കള്ളന്‍ പിടിയില്‍

  reporter July 29, 2018

  കോട്ടയം: മോഷണശേഷം മറന്നുവെച്ച സഞ്ചി ഒടുവില്‍ കള്ളന് വിനയായി. മറന്നുവെച്ചതാകട്ടെ വീടിനടുത്തുള്ള ടെക്‌സ്‌റ്റൈല്‍ ഷോപ്പിന്റെ പേരുള്ള സഞ്ചി. പോലീസിന് കച്ചിത്തുരുമ്ബായത് ഇതാണ്. അധികം വൈകാതെ തന്നെ പോലീസ് കള്ളനെ പിടികൂടി. സംഭവത്തില്‍ തോട്ടയ്ക്കാട് ഗവണ്‍മെന്റ് ആശുപത്രിക്ക് സമീപം വാടകയ്ക്ക് താമസിച്ചിരുന്ന പെരുങ്കാവുങ്കല്‍ മുകേഷ് കുമാറിനെയാണ് പൊലീസ് അറസ്റ്റ് ചെയ്തത്.

  മോഷണം നടന്ന വീട് പരിശോധിച്ച പൊലീസ് സംഘത്തിന് കിണറിനടുത്തുനിന്ന് ഒരു സഞ്ചി ലഭിച്ചു. ടെക്‌സ്‌റ്റൈലിന്റെ പേരും സ്ഥലവും രേഖപ്പെടുത്തിയതായിരുന്നു സഞ്ചി. ഇത് തങ്ങളുടേതല്ലെന്ന് വീട്ടുകാര്‍ ഉറപ്പിച്ചു പറഞ്ഞതോടെയാണ് സഞ്ചി കേസിലെ വഴിത്തിരിവായത്. സഞ്ചി പരിശോധിച്ച പൊലീസിന് അതില്‍നിന്നും ചില തെളിവുകള്‍ ലഭിച്ചു. സംശയിക്കുന്ന ആള്‍ മൊബൈല്‍ ഫോണ്‍ ഉപയോഗിക്കാറില്ലെന്നും പൊലീസ് അന്വേഷണത്തില്‍ മനസ്സിലാക്കി. വീടിനടുത്ത് അന്വേഷണം നടത്തിയ ഷാഡോ സംഘമാണ് ഇയാളെ പിടികൂടാന്‍ പോലീസിനെ സഹായിച്ചത്.

• കീഴാറ്റൂര്‍ ബൈപ്പാസ്: കേന്ദ്രസര്‍ക്കാരിന്റെ രാഷ്ട്രീയക്കളി അവസാനിപ്പിക്കണമെന്ന് ജി. സുധാകരന്‍

  reporter July 28, 2018

  കോട്ടയം: കീഴാറ്റൂര്‍ ദേശീയപാത ബൈപ്പാസുമായി ബന്ധപ്പെട്ട വിഷയത്തില്‍ കേന്ദ്രസര്‍ക്കാരിന്റെ രാഷ്ട്രീയക്കളി അവസാനിപ്പിക്കണമെന്ന് പൊതുമരാമത്ത് മന്ത്രി ജി. സുധാകരന്‍. കീഴാറ്റൂരിലെ നിര്‍ദ്ദിഷ്ട ബൈപ്പാസിന്റെ തുടര്‍നടപടികള്‍ നിര്‍ത്തിവയ്ക്കാന്‍ കേന്ദ്ര സര്‍ക്കാര്‍ നിര്‍ദ്ദേശം
  നല്‍കിയതിനെ തുടര്‍ന്നാണ് പ്രതികരണവുമായി സുധാകരന്‍ രംഗത്തെത്തിയത്.

  കീഴാറ്റൂരില്‍ സംസ്ഥാന സര്‍ക്കാര്‍ എന്തോ ചെയ്ത മട്ടിലാണ് കേന്ദ്രത്തിന്റെ പെരുമാറ്റമെന്നും അലൈന്‍മെന്റ് തയാറാക്കിയതും ഭൂമി ഏറ്റെടുക്കാന്‍ തയാറായതും ദേശീയപാത അതോറിറ്റിയാണെന്നും സുധാകരന്‍ വ്യക്തമാക്കി. കീഴാറ്റൂരിന്റെ പേര് പറഞ്ഞ് ദേശീയപാത വികസനം തടസപ്പെടുത്താനാണെങ്കില്‍ ആ രക്തത്തില്‍ ഞങ്ങള്‍ക്ക് പങ്കില്ലെന്നും സുധാകരന്‍ കൂട്ടിച്ചേര്‍ത്തു.

  3ഡി അലൈന്മെന്റ് നോട്ടിഫിക്കേഷന്‍ തല്‍ക്കാലത്തേക്ക് മരവിപ്പിച്ചു. സമര സമിതി നേതാക്കളുമായി കേന്ദ്ര നേതൃത്വം ചര്‍ച്ച നടത്തിയേക്കുമെന്നും സൂചനയുണ്ട്. ഇനിയൊരു അറിയിപ്പ് ഉണ്ടാകുന്നത് വരെ പദ്ധതിയുമായി ബന്ധപ്പെട്ട തുടര്‍നടപടികള്‍ സ്വീകരിക്കരുതെന്നാണ് കേന്ദ്രം നിര്‍ദ്ദേശിച്ചിരിക്കുന്നത്.

  ബൈപ്പാസിന്റെ അലൈന്‍മെന്റ് പുന:പരിശോധിക്കണമെന്ന് ആവശ്യപ്പെട്ട് കേന്ദ്ര സംഘം റിപ്പോര്‍ട്ട് നല്‍കിയിരുന്നു. ഇത് കേന്ദ്ര ഉപരിതല ഗതാഗത മന്ത്രാലയം പരിഗണിക്കുമെന്നാണ് അറിയുന്നത്. മാത്രമല്ല, ബൈപ്പാസിനെതിരെ സമരം ചെയ്യുന്നവരുമായി ചര്‍ച്ച നടത്താനും കേന്ദ്രം ആലോചിക്കുന്നുണ്ട്.

• കോട്ടയത്ത് ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്ന സ്‌കൂളുകള്‍ക്ക് നാളെ അവധി

  reporter July 27, 2018

  കോട്ടയം: കോട്ടയം ജില്ലയില്‍ ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്ന സ്‌കൂളുകള്‍ക്ക് വെള്ളിയാഴ്ച കളക്ടര്‍ അവധി പ്രഖ്യാപിച്ചു.

  മഴയുടെ ശക്തികുറഞ്ഞ് വെള്ളക്കെട്ട് താഴ്ന്നു തുടങ്ങിയതിനാല്‍ പലരും ക്യാമ്പ് വിട്ട് വീടുകളിലേക്ക് തിരിച്ചു പോയിരുന്നു. അതിനാല്‍, വ്യാഴാഴ്ച ഒമ്പത് ദുരിതാശ്വാസ ക്യാമ്പുകള്‍ കൂടി അടച്ചു.

• കെഎസ്ആര്‍ടിസി ലോഫ്‌ളോര്‍ ബസ്സിനടിയില്‍പ്പെട്ട് വയോധിക മരിച്ചു

  reporter July 26, 2018

  ചെങ്ങന്നൂര്‍: കെ.എസ്.ആര്‍.ടി.സി ബസിനടിയില്‍ പെട്ട് വയോധിക മരിച്ചു. കുറ്റൂര്‍ തലയാര്‍ സ്വദേശിനി ശ്രീദേവി അമ്മ(71)യാണ് മരിച്ചത്.

  അടൂരിലേക്കുള്ള ലോഫ്‌ളോര്‍ ബസ്സിന്റെ അടിയില്‍ പെട്ടാണ് മരണം. ശ്രീദേവി അമ്മയുടെ തലയിലൂടെയാണ് ബസ്സിന്റെ ചക്രം കയറി ഇറങ്ങിയത്. ഇതുവഴി എത്തിയ തിരുവല്ല തഹസില്‍ദാരുടെ വാഹനത്തില്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

• കോട്ടയത്ത് കെഎസ്ആര്‍ടിസി ബസ് താഴ്ചയിലേക്ക് മറിഞ്ഞു: 24 പേര്‍ക്ക് പരിക്ക്

  reporter July 24, 2018

  കോട്ടയം: പാമ്പാടിക്ക് സമീപം കെഎസ്ആര്‍ടിസി ബസ് താഴ്ചയിലേക്ക് മറിഞ്ഞ് അപകടം. സംഭവത്തില്‍ 24 പേര്‍ക്ക് പരുക്കേറ്റു. ആരുടെയും പരുക്ക് ഗുരുതരമല്ലെന്നാണ് വിവരം. രണ്ടു പേരെ കോട്ടയം മെഡിക്കല്‍ കോളേജ് ആശുപത്രിയിലും 22 പേരെ പാമ്പാടി താലൂക്ക് ആശുപത്രിയിലും പ്രവേശിപ്പിച്ചു.

  ഉച്ചയ്ക്ക് 2.45 ഓടെ കെ.കെ റോഡില്‍ പാമ്പാടിക്ക് സമീപം നെടുങ്കുഴിയിലാണ് അപകടം ഉണ്ടായത്. കുമളിയില്‍ നിന്നും കോട്ടയത്തേക്ക് വന്ന ബസാണ് അപകടത്തില്‍ പെട്ടത്. മുന്നില്‍ പോയ ഓട്ടോറിക്ഷ അപ്രതീക്ഷിതമായി വട്ടംതിരിച്ചപ്പോള്‍ ബസ് വെട്ടിച്ചതാണ് അപകടത്തിന് കാരണമായത്.

• കാണാതായ മാധ്യമസംഘത്തിലെ രണ്ടാമത്തെയാളുടെയും മൃതദേഹം കണ്ടെത്തി

  reporter July 24, 2018

  കോട്ടയം: വെള്ളപ്പൊക്ക ദുരന്തം റിപ്പോര്‍ട്ട് ചെയ്തു മടങ്ങുന്നതിനിടെ വള്ളം മറിഞ്ഞു കാണാതായ മാതൃഭൂമി തിരുവല്ല ബ്യൂറോ ഡ്രൈവര്‍ ബിപിന്റെ മൃതദേഹവും കണ്ടെത്തി. കെവി കനാലില്‍നിന്ന് മൂന്നു കിലോ മീറ്റര്‍ അകലെനിന്നാണ് ബിബിന്റെ മൃതദേഹം കണ്ടെത്തിയത്.ഫയര്‍ഫോഴ്‌സും കോട്ടയത്തുനിന്നും എറണാകുളത്തുനിന്നും എത്തിയ സ്‌കൂബാ ഡൈവ് യൂണിറ്റുകളും അഗ്‌നിശമന സേനയും ചേര്‍ന്നാണ് തിരച്ചില്‍ നടത്തിയത്.

  മാതൃഭൂമി ന്യൂസ് തലയോലപ്പറമ്പ് പ്രാദേശിക ലേഖകന്‍ ആപ്പാഞ്ചിറ മാന്നാര്‍ പൂഴിക്കോല്‍ കൊച്ചിന്റെ മകന്‍ കെ.കെ.സജിയുടെ (മെഗാസ് സജി47) മൃതദേഹം രാവിലെ കണ്ടെത്തിയിരുന്നു. കടുത്തുരുത്തി കരിയാറിനടുത്ത് എഴുമാതുരുത്തില്‍ വാര്‍ത്ത റിപ്പോര്‍ട്ട് ചെയ്തു മടങ്ങുന്നതിനിടെ ആയിരുന്നു അപകടം നടന്നത്. തുഴഞ്ഞയാള്‍ ഉള്‍പ്പെടെ അഞ്ചുപേരാണ് വള്ളത്തിലുണ്ടായിരുന്നത്.

  മാതൃഭൂമി ന്യൂസ് കോട്ടയം റിപ്പോര്‍ട്ടര്‍ കെ ബി ശ്രീധരന്‍, തിരുവല്ല യൂണിറ്റിലെ ക്യാമറമാന്‍ അഭിലാഷ് എന്നിവരെ രക്ഷപ്പെടുത്താന്‍ സാധിച്ചിരുന്നു.

• കാണാതായ മാധ്യപ്രവര്‍ത്തകരില്‍ ഒരാളുടെ മൃതദേഹം കണ്ടെത്തി

  reporter July 24, 2018

  കോട്ടയം:വെള്ളപ്പൊക്ക ദുരന്തം റിപ്പോര്‍ട്ട് ചെയ്തു മടങ്ങുന്നതിനിടെ വള്ളം മറിഞ്ഞു കാണാതായ ചാനല്‍സംഘത്തിലെ ഒരാളുടെ മൃതദേഹം കിട്ടി. തലയോലപ്പറമ്പിലെ മാതൃഭൂമി ന്യൂസ് പ്രാദേശിക ലേഖകന്‍ സജിയുടെ മൃതദേഹമാണ് കിട്ടിയത്. തിരുവല്ല ബ്യൂറോ ഡ്രൈവര്‍ ബിപിനായുള്ള തിരച്ചില്‍ പുരോഗമിക്കുകയാണ്.

  രാവിലെ തിരച്ചിലിനായി നാവികസേനയുടെ പ്രത്യേക സംഘം എത്തിയിട്ടുണ്ട്. ശക്തമായ അടിയൊഴുക്കുള്ള സ്ഥലമാണ് ഇവിടെ. അതിനോടൊപ്പം തന്നെ നല്ല മഴയും തുടരുകയാണ്. ഇത് രക്ഷാപ്രവര്‍ത്തനത്തെ ബാധിക്കുമോ എന്ന ആശങ്കയും നിലനില്‍ക്കുന്നുണ്ട്.

  കടുത്തുരുത്തി കരിയാറിനടുത്ത് എഴുമാതുരുത്തില്‍ വാര്‍ത്ത റിപ്പോര്‍ട്ട് ചെയ്തു മടങ്ങുന്നതിനിടെ ആയിരുന്നു അപകടം നടന്നത്. തുഴഞ്ഞയാള്‍ ഉള്‍പ്പെടെ അഞ്ചുപേരാണ് വള്ളത്തിലുണ്ടായിരുന്നത്. മാതൃഭൂമി ന്യൂസ് കോട്ടയം റിപ്പോര്‍ട്ടര്‍ കെ ബി ശ്രീധരന്‍, തിരുവല്ല യൂണിറ്റിലെ ക്യാമറമാന്‍ അഭിലാഷ് എന്നിവരെ രക്ഷപ്പെടുത്താന്‍ സാധിച്ചിരുന്നു.