‘സുപ്രിയയെ ഇന്നലെ കണ്ടുമുട്ടിയത് പോലെ’: ഏഴാം വിവാഹ വാര്‍ഷികത്തിന്റെ നിറവില്‍ പൃഥ്വിരാജ്

ആരാധകരെ ഏറെ ഞെട്ടിച്ച താര വിവാഹങ്ങളില്‍ ഒന്നായിരുന്നു പൃഥ്വിരാജിന്റെ വിവാഹം. പൃഥ്വിരാജിന്റെയും സുപ്രിയയുടെയും വിവാഹ വാര്‍ഷിക ദിനമായിരുന്നു ഇന്നലെ. ബിബിസി ഇന്ത്യയിലെ റിപ്പോര്‍ട്ടറായ സുപ്രിയ മേനോനും പൃഥ്വിരാജുംവിവാഹിതരായത് 2011 ഏപ്രില്‍ 25നായിരുന്നു. ബിബിസിയില്‍ മാധ്യമപ്രവര്‍ത്തകയായി ജോലി ചെയ്ത് വരികയായിരുന്നു സുപ്രിയ. വിവാഹ ശേഷം പൃഥ്വിക്ക് പൂര്‍ണ്ണ പിന്തുണ നല്‍കി ഒപ്പം നില്‍ക്കുകയായിരുന്നു ഈ താരപത്‌നി. അടുത്തിടെ തുടങ്ങിയ പൃഥ്വിരാജ് പ്രൊഡക്ഷന്‍സിന്റെ സാരഥികളിലൊരാള്‍ കൂടിയാണ് സുപ്രിയ.

പാലക്കാട് വെച്ചായിരുന്നു ഇരുവരുടെയും വിവാഹച്ചടങ്ങുകള്‍. പ്രേക്ഷകരെ ശരിക്കും ഞെട്ടിച്ചൊരു താരവിവാഹമായിരുന്നു ഇത്. പൃഥ്വിരാജ് പ്രണയിച്ചേ വിവാഹം കഴിക്കുള്ളൂവെന്നും അവന് ജീവിത പങ്കാളിയെ കണ്ടെത്തുന്നതുമായി ബന്ധപ്പെട്ട് താന്‍ കഷ്ടപ്പെടേണ്ടി വരില്ലെന്ന് മല്ലിക സുകുമാരന്‍ വ്യക്തമാക്കിയിരുന്നു. അങ്ങനെയൊരാളെ കണ്ടെത്തിക്കഴിഞ്ഞാല്‍ അതാരായിരിക്കുമെന്ന് അവന്‍ തുറന്നുപറയുമെന്നും അവര്‍ പറഞ്ഞിരുന്നു.

ബിബിസി മലയാളത്തിലെ അഭിമുഖത്തിന് ശേഷം ഇരുവരും അടുത്ത സുഹൃത്തുക്കളായിരുന്നു. രണ്ടുപേര്‍ക്കുമിടയിലെ ചില കാര്യങ്ങളിലെ സാമ്യത തന്നെയാണ് ഇരുവരേയും ആകര്‍ഷിച്ചത്. ഈ ബന്ധം പ്രണയമായപ്പോഴും പിന്നീടത് വിവാഹത്തിലേക്ക് എത്തിയപ്പോഴും ആ തോന്നല്‍ ശരിയായിരുന്നുവെന്ന് ഇരുവരും തെളിയിക്കുകയും ചെയ്തു സിനിമയുമായി ബന്ധപ്പെട്ട് നടക്കുന്ന പൊതു ചടങ്ങുകളിലും സുഹൃത്തുക്കളുടെ വിവാഹത്തിലുമെല്ലാം താരദമ്പതികള്‍ പങ്കെടുക്കാറുണ്ട്. ഭാവനയുടെ വിവാഹത്തിനെത്തിയ ഇരുവരുടേയും ചിത്രങ്ങള്‍ സോഷ്യല്‍ മീഡിയയിലൂടെ വൈറലായിരുന്നു.

ഒരു വര്‍ഷത്തോളം നീണ്ട് നിന്ന പ്രയത്‌നത്തിനൊടുവിലാണ് പൃഥ്വിരാജ് സ്വന്തം നിര്‍മ്മാണ കമ്പനിയുമായി രംഗത്തെത്തിയത്. സുപ്രിയയ്‌ക്കൊപ്പം ചേര്‍ന്നാണ് പൃഥ്വിരാജ് പ്രൊഡക്ഷന്‍സ് രൂപീകരിച്ചതെന്ന് അന്ന് താരം വ്യക്തമാക്കിയിരുന്നു. ജെനൂസ് മുഹമ്മദ് സംവിധാനം ചെയ്യുന്ന നയന്‍ എന്ന സയന്റിഫിക് ചിത്രവുമായാണ് ഇവര്‍ എത്തുന്നത്. സോണി പിക്‌ചേഴ്‌സിനൊപ്പം ചേര്‍ന്നാണ് ഈ സിനിമ നിര്‍മ്മിക്കുന്നത്. യാത്രകളെ ഏറെ ഇഷ്ടപ്പെടുന്നവരാണ് പൃഥ്വിയും സുപ്രിയയും. നേരത്തെ നിശ്ചയിച്ച പ്രകാരം ഇവര്‍ ഹിമാലയത്തിലേക്ക് പോയിരിക്കുകയാണ്. ഔദ്യോഗികാവശ്യവുമായാണ് ഇത്തവണത്തെ യാത്ര.

താരങ്ങളുടെ മക്കളില്‍ ഏറെ ശ്രദ്ധ നേടിയ പുത്രിയാണ് അലംകൃത. 2014 ലാണ് അലംകൃതയുടെ ജനനം. അലംകൃതയയുടെ കുസൃതിയെക്കുറിച്ച് പൃഥ്വിരാജും മല്ലിക സുകുമാരനും വാചാലരായിരുന്നു. പൃഥ്വിയെപ്പോലെ തന്നെ ബോള്‍ഡാണ് അവളെന്നായിരുന്നു കഴിഞ്ഞ ദിവസം അച്ഛമ്മ വ്യക്തമാക്കിയത്.

‘വിവാഹ വാര്‍ഷിക ദിനത്തില്‍ ആശംസ അറിയിച്ചവര്‍ക്ക് നന്ദി. സുപ്രിയയെ ഇന്നലെ കണ്ടുമുട്ടിയത് പോലെയാണ് തോന്നുന്നത്. ദാമ്പത്യ ജീവിതം ഏഴ് വര്‍ഷം പിന്നിട്ടതായി തോന്നുന്നില്ല’, സുപ്രിയക്കൊപ്പമുള്ള മനോഹരമായൊരു ചിത്രം പോസ്റ്റ് ചെയ്ത് പൃഥ്വി കുറിച്ചത് ഇങ്ങനെയായിരുന്നു.