മലപ്പുറത്ത് മിനി ലോറിയും ബൈക്കും കൂട്ടിയിടിച്ച് രണ്ട് യുവാക്കൾക്ക് ദാരുണാന്ത്യം

മലപ്പുറം: ചമ്രവട്ടത്ത് മിനി ലോറിയും ബൈക്കും കൂട്ടിയിടിച്ച് രണ്ട് യുവാക്കൾ മരിച്ചു. തിരൂർ തൃപ്രങ്ങോട് ആനപ്പടി മണ്ണുപറമ്പിൽ ഷറഫുദ്ദീന്റെ മകൻ സൽമാനുൽ ഫാരിസ് (18), പൊന്ന്യേത്ത് താജുദ്ദീന്റെ മകൻ ഷെഫിൻ ഫർഹാൻ(18) എന്നിവരാണ് മരണപ്പെട്ടത്.

കുറ്റിപ്പുറം – പൊന്നാനി ദേശീയ പാതയിൽ നരിപ്പറമ്പ് പന്തേപ്പാലത്ത് കഴിഞ്ഞ ദിവസം രാത്രി 9 മണിയോടെയാണ് അപകടം നടന്നത്. പൊന്നാനി ഭാഗത്തേയ്‌ക്ക് പോവുകയായിരുന്ന മിനി ലോറിയും ചമ്രവട്ടം ഭാഗത്തേയ്‌ക്ക് വരികയായിരുന്ന ബൈക്കും കൂട്ടിയിടിയ്‌ക്കുകയായിരുന്നു.അപകടത്തിൽ ഗുരുതരമായി പരിക്കേറ്റ ഇരുവരെയും നാട്ടുകാർ ആലത്തിയൂരിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും മരണം സംഭവിച്ചു. ഇൻക്വസ്റ്റ് നടപടികൾക്കായി മൃതദേഹങ്ങൾ തിരൂർ ജില്ലാ ആശുപത്രിയിലേയ്‌ക്ക് മാറ്റി.