26കാരിയെ 7 വര്‍ഷം പീഡിപ്പിച്ച ആള്‍ദൈവത്തിന് എതിരെ കേസ്‌

26കാരിയെ 7 വര്‍ഷം പീഡിപ്പിച്ച ആള്‍ദൈവത്തിന് എതിരെ കേസ്‌

August 24, 2022 0 By Editor

ബെംഗളൂരു: 26 വയസ്സുകാരിയെ ഏഴ് ‌വർഷത്തോളം ലൈംഗികമായി പീഡിപ്പിച്ച കേസിൽ സ്വയംപ്രഖ്യാപിത ആൾദൈവത്തിനും ഭാര്യയ്ക്കുമെതിരെ കേസെടുത്തു. ബെംഗളൂരു കെആർ പുരം പൊലീസ് സ്റ്റേഷനിൽ അതിജീവിതയുടെ അമ്മ നൽകിയ പരാതിയിലാണ് നടപടി.

ഏഴ് വർഷങ്ങൾക്കു മുൻപ് സുഹൃത്തിന്റെ വീട്ടിൽ നടന്ന മതചടങ്ങിനിടെയാണ് യുവതി ‘ആധ്യാത്മിക ഗുരു ’ എന്ന നിലയിൽ അറിയപ്പെട്ടിരുന്ന ആനന്ദ മൂർത്തിയെയും ഭാര്യയെയും പരിചയപ്പെടുന്നത്. യുവതിയുടെ ജീവൻ അപകടത്തിലാണെന്നു ആനന്ദ മൂർത്തി യുവതിയെ ധരിപ്പിക്കുകയായിരുന്നു. പരിഹാരക്രിയ ചെയ്യണമെന്ന മൂർത്തിയുടെ നിർദേശം അനുസരിച്ച് പെൺകുട്ടി ഇയാളുടെ വസതിയിൽ എത്തുകയായിരുന്നുവെന്നു കെആർ പുരം പൊലീസ് പറഞ്ഞു.

വീട്ടിൽ എത്തിയ യുവതിക്കു ലഹരിമരുന്ന് കലർത്തിയ പാനീയം നൽകി ആനന്ദ മൂർത്തി ബലാത്സംഗം ചെയ്‌തെന്നും, ബോധം വന്നപ്പോൾ താൻ അർധ നഗ‌്നയായിരുന്നുവെന്നും ആനന്ദ് മൂർത്തിയും ഭാര്യയും തന്നോടൊപ്പം കട്ടിലിൽ കിടന്നിരുന്നതായും യുവതി മൊഴി നൽകിയിരുന്നു. പെൺകുട്ടിയെ വർഷങ്ങളോളം ദമ്പതികൾ ലൈംഗികമായി ചൂഷണം ചെയ്യുകയായിരുന്നുവെന്നു പൊലീസ് പറയുന്നു. പീഡനത്തിന്റെ ദൃശ്യങ്ങൾ പ്രതികൾ മൊബൈലിൽ പകർത്തിയിരുന്നു. സംഭവം പുറത്തു പറഞ്ഞാൽ കൊല്ലുമെന്നും ദൃശ്യങ്ങൾ പ്രചരിപ്പിക്കുമെന്നും ഇവർ അതിജീവിതയെ ഭീഷണിപ്പെടുത്തിയിരുന്നു. പീഡനദൃശ്യങ്ങൾ കാണിച്ച് ഭീഷണിപ്പെടുത്തി പലയിടങ്ങളിൽ എത്തിച്ച് ക്രൂരമായി പീഡിപ്പിക്കുകയായിരുന്നുവെന്നും അതിജീവിത പരാതിയിൽ പറയുന്നു.

പെൺകുട്ടിയുടെ വിവാഹം ഉറപ്പിച്ചതോടെ വിവാഹത്തിൽ നിന്ന് പിൻമാറാൻ പ്രതികൾ ഭീഷണിപ്പെടുത്തിയിരുന്നതായി പെൺകുട്ടി പറഞ്ഞു. ആനന്ദ മൂർത്തിയും ഭാര്യയും പ്രതിശ്രുത വരന്റെ വീട്ടിലെത്തി പീഡനദൃശ്യങ്ങൾ കാണിച്ചതോടെ പെൺകുട്ടിയുടെ വിവാഹ നിശ്ചയം മുടങ്ങിയിരുന്നു. ഈ സംഭവത്തോടെയാണ് യുവതിയുടെ മാതാപിതാക്കളും ബന്ധുക്കളും പീഡനവിവരം അറിയുന്നതും പൊലീസിൽ പരാതി നൽകുന്നതും. പെൺകുട്ടിയുടെ വിവാഹം നടത്താൻ ശ്രമിച്ചാൽ കുടുംബത്തെ തന്നെ കൊലപ്പെടുത്തുമെന്നു യുവതിയുടെ സഹോദരനെ ആനന്ദ മൂർത്തി ഭീഷണിപ്പെടുത്തിയിരുന്നു. പെൺകുട്ടിയുടെ കുടുംബം പരാതി നൽകിയതോടെ പ്രതിയും ഭാര്യയും ഒളിവിൽ പോയെന്നും അന്വേഷണം ഊർജ്ജിതമാക്കിയെന്നും കെആർ പുരം പൊലീസ് അറിയിച്ചു.