സംസ്ഥാനത്ത് സിബിഐ അന്വേഷണത്തിനുള്ള പൊതുസമ്മതം പിന്‍വലിച്ചു; സര്‍ക്കാര്‍ തീരുമാനം ലൈഫിനെ സിബിഐ അന്വേഷണം ഭയന്നിട്ടോ ?
November 4, 2020
തിരുവനന്തപുരം: സംസ്ഥാനത്ത് സിബിഐക്ക് അന്വേഷണം നടത്താനുള്ള പൊതുസമ്മതം പിന്‍വലിക്കാന്‍ ബുധനാഴ്ച ചേര്‍ന്ന മന്ത്രിസഭാ യോഗം തീരുമാനിച്ചു. ഇനിമുതലുള്ള കേസുകളെയാണ് ഈ നിയന്ത്രണം ബാധിക്കുക.ഈ സാഹചര്യത്തില്‍ സിബിഐക്ക് ഇനി കേസെടുക്കണമെങ്കില്‍ സര്ക്കാരിന്റെ അനുമതി ആവശ്യമാണ്. എന്നാല്‍ കോടതിയുടെ നിര്‍ദേശപ്രകാരം കേസെടുക്കുന്നതിനോ ക്രിമിനല്‍ കേസുകള്‍ വരുമ്ബോഴോ ഇത് ബാധകമല്ല.സംസ്ഥാനത്ത് സിബിഐയെ വിലക്കണമെന്ന് നേരത്തെ സിപിഐയും പോളിറ്റ്ബ്യൂറോയും നിര്‍ദേശിച്ചിരുന്നു. വടക്കാഞ്ചേരി ലൈഫ് മിഷന്‍ പദ്ധതിയുമായി ബന്ധപ്പെട്ട് കോടതിയുടെ നിര്‍ദേശപ്രകാരമോ സര്ക്കാരിന്റെ ആവശ്യപ്രകാരമോ അല്ലാതെ സിബിഐ അനില്‍ അക്കര എംഎ‍ല്‍എയുടെ പരാതിയില്‍ അന്വേഷണം ആരംഭിക്കുകയും ഉന്നത ഉദ്യോഗസ്ഥരെ വിളിച്ചുവരുത്തുകയും ചെയ്തിരുന്നു. ഇത് സര്‍ക്കാരിനെ പ്രകോപിപ്പിച്ചിരുന്നു. തുടര്‍ന്നാണ് സിബിഐക്കുള്ള പൊതുസമ്മതം പുനഃപരിശോധിക്കുന്നത് സംബന്ധിച്ച്‌ സര്‍ക്കാര്‍ നിയമോപദേശം തേടിയത്. പൊതുസമ്മതം പിന്‍വലിക്കാനുള്ള തീരുമാനം എക്സിക്യൂട്ടീവ് ഓര്‍ഡറായി പുറത്തിറക്കും. 2017-ലാണ് സിബിഐക്ക് സംസ്ഥാനത്ത് അന്വേഷണം നടത്താന്‍ സര്‍ക്കാര്‍ പൊതുസമ്മതം നല്‍കിയത്.
