കോവിഡ്​19: തമിഴ്​നാട്ടില്‍ രോഗബാധിതരുടെ എണ്ണം രണ്ട്​ ലക്ഷം കവിഞ്ഞു

ചെന്നൈ: സംസ്​ഥാനത്ത്​ രോഗബാധിതരുടെ എണ്ണം രണ്ടു ലക്ഷം കവിഞ്ഞു. പ്രതിദിന കണക്കിലും റെക്കോഡ്​ വര്‍ധനവ്​. 24 മണിക്കൂറിനിടെ 64,315 സാമ്പിളുകള്‍ പരിശോധിച്ചതില്‍ 6,988 പേര്‍ക്കാണ്​ പുതുതായി രോഗബാധ കണ്ടെത്തിയത്​. ഇതില്‍ കേരളത്തില്‍നിന്നെത്തിയ നാലു പേരും ഉള്‍പ്പെടും.
ചികിത്സയില്‍ കഴിഞ്ഞിരുന്ന 89 പേര്‍ കൂടി മരിച്ചു. ഇതോടെ ആകെ മരണസംഖ്യ 3,409. ചെന്നൈയില്‍ മാത്രം മരിച്ചത്​ 1,989 പേര്‍. സംസ്​ഥാനത്തെ ആകെ രോഗബാധിതരുടെ എണ്ണം 2,06,737 ആയി. ഇതേവരെ 22,87,334 സാമ്പിളുകള്‍ പരിശോധിച്ചു.
ചെന്നൈയില്‍ മാത്രം 24 മണിക്കൂറിനിടെ 1,329 പേര്‍ക്ക്​ രോഗബാധ ഉണ്ടായി. നഗരത്തില്‍ മൊത്തം രോഗബാധിതരുടെ എണ്ണം 93,537 ആയി. ശനിയാഴ്​ച സംസ്​ഥാനത്തെ വിവിധ ആശുപത്രികളില്‍നിന്ന്​ 7,758 പേര്‍ രോഗമുക്തി നേടി. രോഗം ഭേദമായി വിട്ടയച്ചവരുടെ എണ്ണം 1,51,055 ആണ്​. നിലവില്‍ ചികില്‍സയില്‍ കഴിയുന്നവരുടെ എണ്ണം 52,273.