കോഴിക്കോട്ട് വനിത ഡോക്ടര്‍ക്ക് കോവിഡ്: പത്തു പേര്‍ നിരീക്ഷണത്തില്‍
May 20, 2020കോഴിക്കോട്: താമരശ്ശേരിയിലെ സ്വകാര്യ ആശുപത്രിയില്‍ ജോലി ചെയ്തിരുന്ന കര്‍ണാടക സ്വദേശിനിയായ ഡോക്ടര്‍ക്ക് കോവിഡ് സ്ഥിരീകരിച്ചു. ആശുപത്രിയിലെ ഗൈനക്കോളജി വിഭാഗത്തിലെ ഡോക്ടര്‍ക്കാണ് രോഗം സ്ഥിരീകരിച്ചത്. കര്‍ണാടകയിലേക്ക് തിരികെ പോയി 13ാം ദിവസം വൈറസ് ബാധ സ്ഥിരീകരിക്കുകയായിരുന്നു.
ഇതേതുടര്‍ന്ന് ആശുപത്രിയിലെ ആറ് ജീവനക്കാരും ഡോക്ടറുടെ അടുത്ത് പരിശോധനക്കെത്തിയ നാല് ഗര്‍ഭിണികളും ഉള്‍പ്പെടെ പത്ത് പേരെ ക്വാറന്‍റീനിലാക്കിയിട്ടുണ്ട്. ഡോക്ടറുടെ ഡ്രൈവറുടേതുള്‍പ്പെടെ ഏഴു പേരുടെ സാമ്പിള്‍ പരിശോധിക്കാന്‍ ആരോഗ്യ വകുപ്പ് തീരുമാനിച്ചിട്ടുണ്ട്. താമരശ്ശേരിയില്‍ ഇവരുമായി സമ്പര്‍ക്കം പുലര്‍ത്തിയവരെ കണ്ടെത്താനുള്ള ശ്രമം തുടരുകയാണ്.
ഈ ഡോക്ടർക്ക് എവിടെ നിന്നാണ് രോഗം പടർന്നതെന്ന കാര്യത്തിൽ അവ്യക്തത തുടരുകയാണ്. കേരളത്തില്‍ നിന്നാകാം രോഗം പകര്‍ന്നതെന്ന സംശയം ഡോക്ടര്‍ ആരോഗ്യ വകുപ്പിനെ അറിയിച്ചിട്ടുണ്ട്. കര്‍ണാടകയില്‍ തിരിച്ചെത്തിയത് മുതല്‍ ഹോം ക്വാറന്‍റീനിലായിരുന്നെന്നും മറ്റാരുമായും സമ്പര്‍ക്കം പുലര്‍ത്തിയിട്ടില്ലെന്നും ഇവര്‍ വ്യക്തമാക്കി.
