അഴകായ് ആന്തൂറിയം ; പരിചരണമിങ്ങനെ.....

1. വായു സഞ്ചാരം ഏറെ ആവശ്യമുള്ള ചെടിയാണ് ആന്തൂറിയം. ഇതിനാല്‍ നല്ല വായു സഞ്ചാരമുള്ള സ്ഥലം വേണം കൃഷിക്കായി തെരഞ്ഞെടുക്കാന്‍. ഇടുങ്ങിയ സ്ഥലങ്ങളിലും മതിലരികിലുമൊക്കെ വളര്‍ത്തിയാല്‍ കുമിള്‍ രോഗങ്ങള്‍ ബാധിക്കും.

2. കൃത്യമായ അളവില്‍ മാത്രമേ ഈ ചെടിക്ക് സൂര്യപ്രകാശം ആവശ്യമുള്ളൂ. 35 ശതമാനം സൂര്യപ്രകാശം ആവശ്യമാണെന്നാണ് കൃഷി വിദഗ്ധര്‍ പറയുന്നത്. നേരിട്ട് സൂര്യപ്രകാശം ലഭിക്കുന്നത് ചെടി നശിക്കാന്‍ കാരണമാകും. നേരിട്ട് സൂര്യപ്രകാശം ചെടികളില്‍ പതിച്ചാല്‍ ആ ഭാഗത്ത് പൊള്ളല്‍ ഉണ്ടാവുകയും തുടര്‍ന്ന് ഇല മഞ്ഞളിക്കുകയും ക്രമേണ പഴുത്തു കൊഴിഞ്ഞു വീഴുകയും ചെയ്യുന്നു. ഷേഡ് നെറ്റ് വിരിച്ച് കൃഷി ചെയ്യുകയാണ് ഉത്തമം.

3. ദിവസവും ഒരു പ്രാവശ്യമെങ്കിലും ചെടികള്‍ നിര്‍ബന്ധമായി നനച്ചിരിക്കണം. വരള്‍ച്ച അനുഭവപ്പെടുമ്പോള്‍ രണ്ടു തവണ നനയ്‌ക്കേണ്ടതാണ്. കൂടക്കൂടെ തറ നനച്ചു കൊടുക്കുന്ന പക്ഷം അന്തരീക്ഷ ഈര്‍പ്പം വര്‍ധിപ്പിക്കുവാന്‍ കഴിയും. വെള്ളം കെട്ടിക്കിടക്കുവാന്‍ ഒരിക്കലും അനുവദിക്കരുത്. ഈര്‍പ്പം കൂടിയാല്‍ ചെടി അഴുകുവാന്‍ ഇടയാകും.

4. ചട്ടിയില്‍ നടുമ്പോള്‍ നടീല്‍ മിശ്രിതം പ്രധാനമാണ്. വായു, ജലം, വേര് എന്നിവയ്ക്ക് ചട്ടിക്കുള്ളില്‍ സ്വതന്ത്രമായി സഞ്ചരിക്കാനുള്ള സൗകര്യമുണ്ടായിരിക്കണം. ഓടിന്‍ കഷ്ണവും കരിയും കൂടി കലര്‍ത്തി മാധ്യമമായി ഉപയോഗിക്കാം. അങ്ങനെ ചെയ്യുമ്പോള്‍ ചകിരി നീക്കം ചെയ്ത തൊണ്ട് അര ഇഞ്ചു വീതിയില്‍ 2 ഇഞ്ച് നീളത്തില്‍ വെട്ടി അത് വേരുകള്‍ കേന്ദ്രീകരിക്കുന്ന ഭാഗത്ത് അവയുടെ ചുറ്റുമായി കിടക്കത്തക്ക വിധം ഇട്ടു കൊടുക്കണം.

5. തറയില്‍ നടുമ്പോഴും ശ്രദ്ധിക്കണം. ചെടികള്‍ തമ്മിലും വരികള്‍ തമ്മിലും 45ഃ45 സെ.മീ അകലം നല്‍കണം. 70% ഷേഡ് നെറ്റ് മുകളില്‍ കെട്ടി സൂര്യപ്രകാശത്തിന്റെ തീവ്രത നിയന്ത്രിക്കണം.

6. കീട-രോഗ ബാധയ്‌ക്കെതിരേ ജൈവ കീടനാശിനികള്‍ മാത്രമേ ഉപയോഗിക്കാവൂ. രാസ കീടനാശിനി പ്രയോഗിക്കേണ്ട സാഹചര്യം വന്നാല്‍ വിദഗ്ധരുമായി ആലോചിച്ച ശേഷം മാത്രം ചെയ്യുക.

7. വൈറസ് ബാധ എളുപ്പം പിടിപെടുന്ന ഇനമാണ്, ഇതിനാല്‍ കൈകള്‍ വൃത്തിയാക്കിയ ശേഷം മാത്രം ചെടികള്‍ പരിചരിക്കുക. 8. ദിവസത്തില്‍ ഒരിക്കലെങ്കിലും ചെടികള്‍ നിരീക്ഷിക്കുക. പല പ്രശ്‌നങ്ങളും രൂക്ഷമാകും മുമ്പ് മനസിലാക്കാനിതു സഹായിക്കും.