വയറുവേദനയുമായി ഹോസ്പിറ്റലിൽ പോയ മോഷ്ടാവ് കുടുങ്ങി ; ഓപ്പറേഷൻ നടത്തി പുറത്തെടുത്തത് മോതിരങ്ങളും കമ്മലുമടക്കം 35 ഗ്രാം സ്വർണ്ണാഭരണങ്ങൾ
May 30, 2021മോഷണമുതൽ വിഴുങ്ങിയ കള്ളന്റെ സിനിമ മലയാളികൾ മറന്നിട്ടില്ല . എന്നാൽ സമാന സംഭവം കർണാടക കേരള അതിർത്തി പ്രദേശമായ ദക്ഷിണ കന്നടയിലെ സുള്ള്യയിലും നടന്നു.കഴിഞ്ഞ ദിവസമാണ് ഷിബു എന്നയാൾ കഠിനമായ വയറുവേദനയെ തുടർന്ന് സുള്ള്യയിലെ ആശുപത്രിയിലെത്തിയത് . മോഷണമുതൽ വിഴുങ്ങിയ ശേഷമാണ് വേദന തുടങ്ങിയതെന്ന വിവരം മാത്രം രോഗി മറച്ചു വച്ചു . ഡോക്ടറുടെ നിർദേശപ്രകാരം എക്സ്റേ എടുത്തതോടെ വയറ്റിൽ കുടുങ്ങിക്കിടക്കുന്നത് ആഭരണങ്ങളാണെന്ന് തിരിച്ചറിഞ്ഞു.
ഇന്ന് രാവിലെ ഓപ്പറേഷൻ നടത്തി ആഭരണങ്ങൾ പുറത്തെടുത്തു . ചെറുതും വലുതുമായ മോതിരങ്ങളും കമ്മലും അടക്കം 30 സ്വർണ്ണാഭരണങ്ങളാണ് വയറ്റിലുണ്ടായിരുന്നത് . എല്ലാം ചേർത്ത് 35 ഗ്രാം ഉണ്ടായിരുന്നു. തുടർന്ന് ആശുപത്രി അധികൃതർ പൊലീസിൽ വിവരമറിയിച്ചു. ഇതോടെ ഇയാളുടെ സഹായി തങ്കച്ചനെയടക്കം പോലീസ് കസ്റ്റഡിയിലെടുത്തു .
