മകന്‍ ഇല്ലെന്ന കാരണം ചൂണ്ടിക്കാട്ടി ഭാര്യയ്ക്ക് മര്‍ദനം; വഴക്കിനിടെ ഉറങ്ങിക്കിടന്ന 2 വയസുകാരിയെ തറയിലടിച്ച്‌ കൊന്ന് പിതാവ്

മകനുണ്ടാകാത്തതിന്‍റെ പേരില്‍ ഭാര്യയുമായി വഴക്കിട്ടശേഷം രണ്ടുവയസുകാരിയെ പിതാവ്​ നിലത്തടിച്ച്‌ കൊലപ്പെടുത്തി . ഗുരുതര പരിക്കുകളോടെ അഞ്ചുവയസുകാരിയായ മൂത്തമകള്‍ ആശുപത്രിയില്‍ ചികിത്സയിലാണ്​. ആന്ധ്രപ്രദേശിലാണ് മനസാക്ഷിയെ നടുക്കുന്ന സംഭവം.

ജൂലായ് 9 ന്​ ആന്ധ്രയിലെ വിസിനനഗരം ജില്ലയിലാണ്​​ സംഭവം. രണ്ടുവയസുകാരി പ്രണവിയും അഞ്ചുവയസുകാരി സിരിയും വീട്ടില്‍ കിടന്നുറങ്ങുകയായിരുന്നു. വീട്ടിലെത്തിയ പിതാവ്​ പ്രസാദ്​ ഭാര്യയുമായി വഴക്കടിച്ചു. മകന്‍ ഇല്ലെന്ന കാരണം പറഞ്ഞായിരുന്നു ക്രൂര മര്‍ദനം. തുടര്‍ന്ന്​ ഭാര്യയോട്​ വിവാഹമോചനവും ആവ​ശ്യപ്പെട്ടിരുന്നു. ഭാര്യയുമായി വഴക്കിട്ട ശേഷം മക്കളുടെ നേര്‍ക്ക്​ തിരിയുകയായിരുന്നു. ഉറങ്ങികിടന്ന പ്രണവിയെ വലിച്ചിഴച്ച​ശേഷം കാലില്‍ പിടിച്ച്‌​ തല സിമന്‍റ്​ ഭിത്തിയിലേക്ക്​ അടിക്കുകയായിരുന്നു. കുട്ടി അപ്പോള്‍ തന്നെ മരിച്ചു.​ തുടര്‍ന്ന്​ സിരിയുടെ തലയും നിലത്തേക്ക്​ അടിച്ചു. കുട്ടിയെ ആശുപത്രിയില്‍ പ്രവേശിപ്പിച്ചു .

രണ്ടാമത് പിറന്നതും പെണ്‍കുഞ്ഞ്​ ആയതോടെ ഇയാള്‍ അസ്വസ്​ഥതയിലായിരുന്നു. തുടര്‍ന്ന്​ ഇയാള്‍ ഭാര്യയെ വിവാഹ മോചനത്തിന്​ നിര്‍ബന്ധിച്ചിരുന്നു. ഒരാഴ്ചമുമ്ബ്​ ദമ്ബതികള്‍ തമ്മിലുള്ള വഴക്കിനെ തുടര്‍ന്ന്​ ഇരുവരുടെയും ബന്ധുക്കള്‍ ഇടപ്പെട്ടിരുന്നു. തുടര്‍ന്ന്​ ഭാര്യയും മക്കളും യുവതിയുടെ മാതാപിതാക്കളുടെ വീട്ടിലായിരുന്നു താമസം. സംഭവത്തില്‍ പൊലീസ്​ കേസ്​ രജിസ്റ്റര്‍ ചെയ്​തു. പ്രതി ഒളിവിലാണ് .