പർദ്ദ ധരിച്ച സ്ത്രീ കാറിനു കുറുകെ ചാടി; സ്പ്രേ അടിച്ച് ബോധം കെടുത്തി; കോഴിക്കോട് കാട്ടില്‍പീടികയിൽ 25 ലക്ഷം കവര്‍ന്നത് ഇങ്ങനെ...
കോഴിക്കോട്: എടിഎമ്മിൽ നിക്ഷേപിക്കാൻ കൊണ്ടുപോയ 25 ലക്ഷം രൂപ അക്രമികൾ കവർന്നത് കാർ ഡ്രൈവറെ ബോധം കെടുത്തിയെന്ന് റിപ്പോർട്ട്. ഡ്രൈവറുടെ കണ്ണിൽ മുളക് പൊടി വിതറുകയും, സ്പ്രേ അടിച്ച് ബോധം കെടുത്തുകയും ചെയ്തു. ഡ്രൈവർ നൽകിയ മൊഴിയിലാണ് ഇക്കാര്യം പറയുന്നത്.
വടകരയ്ക്കും കുറ്റ്യാടിക്കും ഇടയിലുള്ള എലത്തൂർ കാട്ടില്‍പീടികയിൽ വെച്ചാണ് ആക്രമണം നടന്നതെന്ന് പയ്യോളി സ്വദേശിയായ ഡ്രൈവർ സുഹൈൽ പറയുന്നു. ഇന്ത്യ വണ്‍ എടിഎം ഫ്രാഞ്ചൈസിയുടെ പണമാണ് സുഹൈൽ കാറിൽ കൊണ്ടു പോയിരുന്നത്. കോഴിക്കോട് ഭാഗത്തേക്ക് പണവുമായി വരികയായിരുന്നു സുഹൈൽ. അരിക്കുളം കുരുടി മുക്കിലെത്തിയപ്പോൾ പർദ്ദയിട്ട ഒരു സ്ത്രീ കാറിന് കുറുകെ ചാടി. താൻ വണ്ടി നിർത്തിയ ഉടനെ സ്ത്രീയും ഒരു സംഘമാളുകളും അതിക്രമിച്ച് കാറിലേക്ക് കയറുകയും കണ്ണിലേക്ക് മുളകുപൊടി വിതറുകയും ചെയ്തു. സ്പ്രേ അടിച്ച് ബോധം കെടുത്തിയെന്നും സുഹൈൽ പറയുന്നു. എല്ലാവരും പർദ്ദയാണ് ധരിച്ചിരുന്നതെന്നും ചില റിപ്പോർട്ടുകളിലുണ്ട്. ഇക്കാര്യത്തിൽ വ്യക്തതയില്ല.
പിന്നീട് ബോധം വന്നപ്പോൾ താനും കാറും തിരുവങ്ങൂർ ഭാഗത്താണ് കിടന്നിരുന്നത്. സുഹൈലിനെ കാറിൽ കെട്ടിയിട്ട നിലയിലായിരുന്നു. പർദ്ദധാരിക്കൊപ്പം വേറെയും നിരവധി പേർ ഉണ്ടായിരുന്നെന്ന് സുഹൈൽ പറയുന്നു. കൊയിലാണ്ടി പോലീസ് എത്തിയാണ് സുഹൈലിനെ ആശുപത്രിയിലേക്ക് മാറ്റിയത്. ഇയാളെ വൈദ്യപരിശോധന നടത്തിയ ശേഷം കൊയിലാണ്ടി പോലീസ് സ്റ്റേഷനിൽ എത്തിച്ചു.
പോലീസ് അന്വേഷണം ആരംഭിച്ചിട്ടുണ്ട്. കാറിനകത്ത് നിറയെ മുളകുപൊടിയാണ്. യുവാവിന്റെ ദേഹത്തും മുളകുപൊടിയുണ്ടായിരുന്നു. കെട്ടിയിട്ട നിലയില്‍ കാറിൽ കിടക്കുകയായിരുന്നു ഇയാൾ.
