പിജിമെറിൽ സീനിയർ റസിഡന്റ്സ് മെഡിക്കൽ ഓഫിസർ

കേ​ന്ദ്രസർക്കാറിന് കീഴിൽ ചണ്ഡിഗഢിലെ പോസ്റ്റ് ഗ്രാജുവേറ്റ് ഇൻസ്റ്റിറ്റ്യൂട്ട് ഓഫ് മെഡിക്കൽ എജുക്കേഷൻ ആൻഡ്​ റിസർച് (പിജിമെർ) താഴെ പറയുന്ന തസ്തികകളിൽ നിയമനത്തിന് അപേക്ഷകൾ ക്ഷണിച്ചു.

സീനിയർ റസിഡന്റ്സ് - ഒഴിവുകൾ 109, ജൂനിയർ/സീനിയർ ഡെമോൺസ്ട്രേറ്റർ 10 (വിവിധ സ്​പെഷാലിറ്റികളിലാണ് അവസരം). സീനിയർ മെഡിക്കൽ ഓഫിസർ 1. ഈ തസ്തികകളിലേക്കുള്ള നിയമനം പിജിമെർ, ചണ്ഡിഗഢിലാണ്.

പോസ്റ്റ് ഗ്രാജുവേറ്റ് ഇൻസ്റ്റിറ്റ്യൂട്ട് (പി.ജി.ഐ) സാറ്റലൈറ്റ് സെന്റർ, സാൻഗ്രീറിൽ (പഞ്ചാബ്) സീനിയർ റസിഡന്റ്സ് തസ്തികയിൽ 10 ഒഴിവുകളും സീനിയർ​ മെഡിക്കൽ ഓഫിസർ തസ്തികയിൽ ഒരൊഴിവും ലഭ്യമാണ്.

പരമാവധി മൂന്നു വർഷത്തേക്കാണ് നിയമനം. യോഗ്യതാ മാനദണ്ഡങ്ങളും സെലക്ഷൻ നടപടികളും അടക്കം വിശദമായ വിജ്ഞാപനം (പരസ്യനമ്പർ PGI/RC/046/2024/3368) www.pgimer.edu.inൽനിന്ന് ഡൗൺലോഡ് ചെയ്യാം. വെബ്സൈറ്റിൽ ഹോം പേജിലെ റിക്രൂട്ട്മെന്റ് ലിങ്ക് വഴി ഓൺലൈനായി നവംബർ 24 വരെ രജിസ്റ്റർ ചെയ്യാവുന്നതാണ്.

അപേക്ഷാഫീസ് 1500 രൂപ. എസ്.സി/എസ്.ടി വിഭാഗങ്ങൾക്ക് 800 രൂപ. ട്രാൻസാക്ഷൻ ചാർജ് കൂടി നൽകേണ്ടിവരും. ഭിന്നശേഷിക്കാരെ (പി.ഡബ്ല്യു.ബി.ഡി) ഫീസിൽനിന്ന് ഒഴിവാക്കിയിട്ടുണ്ട്. തിരഞ്ഞെടുപ്പിനായുള്ള 75 മാർക്കിന്റെ കമ്പ്യൂട്ടർ അധിഷ്ഠിത ടെസ്റ്റ് ബംഗളൂരു, ചണ്ഡിഗഢ്​, ഡൽഹി, കൊൽക്കത്ത നഗരങ്ങളിൽ ഡിസംബർ ആറിന് നടത്തും. അഡ്മിറ്റ് കാർഡുകൾ യഥാസമയം വെബ്സൈറ്റിൽനിന്നും ഡൗൺലോഡ് ചെയ്യാം.