ഏറ്റവും മികച്ച അന്വേഷണ ഏജന്‍സി ഐ.എസ്.ഐ ആണെന്ന് പാക് പ്രധാനമന്ത്രി
September 14, 2018ഇസ്ലാമാബാദ് : പാക്ക് സൈന്യത്തെയും ചാര സംഘടനയായ ഐ.എസ്.ഐയെയും വാനോളം പുകഴ്ത്തി പാക്ക് പ്രധാനമന്ത്രി ഇമ്രാന്‍ ഖാന്‍. പാക്ക് പ്രതിരോധത്തിന്റെ കുന്തമുന ഐ.എസ്.ഐ ആണെന്നും, സൈന്യത്തിന്റെയും സുരക്ഷാ ഏജന്‍സികളുടെയും പിന്നില്‍ സര്‍ക്കാരും ജനങ്ങളും അണിനിരക്കുമെന്നും ഖാന്‍ ഐ.എസ്.ഐ ഉദ്യോഗസ്ഥരോട് വ്യക്തമാക്കി. ലോകത്തെ ഏറ്റവും മികച്ച രഹസ്യാന്വേഷണ ഏജന്‍സി ഐ.എസ്.ഐ ആണെന്നും ഇമ്രാന്‍ ഖാന്‍ അവകാശപ്പെട്ടു.
പാക്കിസ്ഥാന്‍ സൈന്യത്തിന്റെ അടുപ്പക്കാരനായി അറിയപ്പെടുന്ന ഇമ്രാന്‍ ഖാന്‍ ഐ.എസ്.ഐ ആസ്ഥാനം സന്ദര്‍ശിക്കവെയാണ് ചാര സംഘടനയെ പ്രശംസിച്ചത്. സുരക്ഷാ ഏജന്‍സികളുടെ വക്താവ് എന്നാണ് വിമര്‍ശകര്‍ ഇമ്രാന്‍ ഖാനെ വിശേഷിപ്പിക്കുന്നത്. സൈന്യത്തിന്റെ പിന്തുണയോടെയാണ് ഇമ്രാന്‍ ഖാന്‍ പ്രധാനമന്ത്രി പദത്തില്‍ എത്തിയതെന്നും പ്രതിപക്ഷം ആരോപണം ഉന്നയിച്ചിരുന്നു.
