ലയണല്‍ മെസ്സി പുതിയ ക്ലബ്ബിലേക്ക്; ഫുട്‌ബോള്‍ ലോകത്തെ ഞെട്ടിച്ച്‌ ബാഴ്സലോണ
August 6, 2021
ബാഴ്സലോണ: ബാഴ്സലോണ ഇതിഹാസതാരം ലയണല്‍ മെസ്സി ക്ലബ്ബ് വിടുന്നു. ബാഴ്സലോണ തന്നെയാണ് ഇക്കാര്യം പുറത്തുവിട്ടത്. കരാര്‍ മെസ്സി പുതുക്കുമെന്ന റിപ്പോര്‍ട്ടുകള്‍ക്കിടെ അപ്രതീക്ഷിതമായിട്ടായിരുന്നു മെസ്സിയുടെ ക്ലബ്ബ് മാറ്റത്തെക്കുറിച്ച് ബാഴ്സലോണ അറിയിപ്പ് നല്‍കിയത്. സാമ്പത്തികവും സാങ്കേതികവുമായ തടസ്സങ്ങള്‍ എന്നാണ് മെസ്സി ക്ലബ്ബ് വിടാനുള്ള കാരണമായി ബാഴ്സലോണ പറയുന്നത്.
പതിനെട്ടു വര്‍ഷത്തോളമായി ബാഴ്‌സലോണയുടെ എല്ലാമെല്ലാമായിരുന്നു മെസ്സി. താരം ക്ലബ്ബില്‍ തന്നെ കരിയര്‍ അവസാനിപ്പിക്കുമെന്നായിരുന്നു ആരാധകരുടേയും പ്രതീക്ഷ. എന്നാല്‍, കഴിഞ്ഞ സീസണ്‍ ഒടുവില്‍ കരാര്‍ അവസാനിച്ച മെസ്സിക്ക് പ്രതീക്ഷിച്ച പ്രതിഫലം ലഭിക്കില്ലെന്ന് ഉറപ്പായതോടെയാണ് ക്ലബ്ബ് വിടാന്‍ തീരുമാനിച്ചതെന്നാണ് റിപ്പോര്‍ട്ട്. രണ്ടിലധികം ക്ലബ്ബുകള്‍ മെസ്സിക്കുവേണ്ടി സജീവമായി രംഗത്തെത്തിക്കഴിഞ്ഞു.
കരാര്‍ പുതുക്കുന്നതുമായി ബന്ധപ്പെട്ട് മെസ്സിയും ബാഴ്‌സലോണയും അന്തിമ തീരുമാനത്തിലെത്തുന്നതിന്റെ തൊട്ടു മുന്‍പാണ് മെസ്സിയുടെ ക്ലബ്ബുമാറ്റ വാര്‍ത്തയും പുറത്തുവരുന്നത്. മെസ്സി ഇക്കാര്യത്തില്‍ പ്രതികരിച്ചിട്ടില്ല. ബാഴ്സലോണയ്ക്കായി മെസ്സി നല്‍കിയ സംഭാവനയ്ക്ക് ഹൃദയത്തില്‍ നിന്ന് നന്ദി അറിയിക്കുന്നതായും ഭാവിയില്‍ എല്ലാ ആശംസകളും നേരുന്നതായും എഫ്.സി ബാഴ്സലോണ അറിയിച്ചു.
