ശോഭന നല്ലസുഹൃത്താണ്, തിരുവനന്തപുരത്ത് മത്സരിക്കില്ലെന്ന് അവര്‍ ഫോണില്‍ അറിയിച്ചു- തരൂര്‍
February 28, 2024തൃശ്ശൂര്‍: തിരുവനന്തപുരത്ത് ബി.ജെ.പി.ക്ക് ഒട്ടേറെ പേരുകള്‍ ഉയരുന്നത് നിരാശയില്‍നിന്നാണെന്നു വ്യക്തമെന്ന് ശശി തരൂര്‍ എംപി. നടി ശോഭന നല്ലസുഹൃത്താണ്. മത്സരിക്കില്ലെന്ന് അവര്‍ ഫോണില്‍ അറിയിച്ചെന്നും തരൂര്‍ പറഞ്ഞു. എന്നാല്‍, തിരുവനന്തപുരത്തെ എതിരാളികളെ വിലകുറച്ച് കാണുന്നില്ല. ബി.ജെ.പി.യുടെ വിദ്വേഷരാഷ്ട്രീയം കേരളത്തില്‍ വിലപ്പോവില്ലെന്നും തരൂര്‍ പറഞ്ഞു.
രാഹുല്‍ഗാന്ധി വയനാട്ടില്‍ മത്സരിക്കരുതെന്ന സി.പി.ഐ. നിലപാട് ശരിയല്ലെന്നും അദ്ദേഹം വ്യക്തമാക്കി. അങ്ങനെയെങ്കില്‍ കോണ്‍ഗ്രസിനെതിരേ സി.പി.ഐ. മത്സരിക്കരുത്. രാഹുല്‍ഗാന്ധിയുടെ സീറ്റില്‍ തീരുമാനമായില്ല. ഒന്നില്‍ക്കൂടുതല്‍ സീറ്റില്‍ മത്സരിക്കാന്‍ സാധ്യതയുണ്ട്. രാഹുലിനെ മത്സരിപ്പിക്കാന്‍ കൂടുതല്‍ സംസ്ഥാനങ്ങള്‍ താത്പര്യം പ്രകടിപ്പിച്ചിട്ടുണ്ടെന്നും തരൂര്‍ പറഞ്ഞു. ഗുരുവായൂര്‍ സന്ദര്‍ശനത്തിനുശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
