കൊല്ലങ്കോട്ട് പുലി ചത്തത് ഹൃദയാഘാതം മൂലമെന്ന് പോസ്റ്റ് മോർട്ടം റിപ്പോർട്ട്

കൊല്ലങ്കോടിനടുത്ത് നെന്മേനി വാഴപ്പുഴയില്‍ സ്വകാര്യതോട്ടത്തിലെ കെണിയിലാണ് നാലുവയസ്സ് പ്രായമുള്ള പെണ്‍പുലി ബുധനാഴ്ച രാവിലെ അഞ്ചരയോടെ കുടുങ്ങിയത്. സംഭവസ്ഥലത്തുനിന്ന് അരക്കിലോമീറ്റര്‍ അകലെയുള്ള തെന്മലയില്‍നിന്ന് തീറ്റതേടിയാകാം പുലി ഇവിടേക്ക് എത്തിയതെന്നാണ് കരുതുന്നത്. കെണിയില്‍ മണിക്കൂറുകളോളം കുടുങ്ങിക്കിടന്ന പുലിയെ മയക്കുവെടിവെച്ച് കാട്ടിലേക്ക് മാറ്റാനുള്ള ശ്രമത്തിനിടെയാണ് ചത്തത്. പതിവായി പന്നികള്‍ സഞ്ചരിക്കുന്ന വഴിയില്‍ കെണിയായി കേബിള്‍ വയര്‍ ഉപയോഗിച്ച് വെച്ച കെണിയില്‍ പുലി കുടുങ്ങുകയായിരുന്നു എന്നാണ് നിഗമനം. പുലിയുടെ ഇടുപ്പിലും കൈയിലുമായി കുടുക്ക് മുറുകിയ നിലയിലായിരുന്നു.