സർക്കാർ ഭക്ഷണം മാത്രം നൽകിയാൽ മതിയെന്ന നിർബന്ധബുദ്ധി; സന്നദ്ധ സംഘടനകളെ വിലക്കി: രക്ഷാപ്രവർത്തകർക്ക് ഭക്ഷണം ഇല്ലെന്ന് പരാതി; ഡേറ്റ് കഴിഞ്ഞ ബ്രഡ്ഡും ബണ്ണുമെന്നും ആക്ഷേപം

എന്നാൽ ഇത് സർക്കാർ ഇന്ന് മുതൽ വിലക്കുകയായിരുന്നു. എന്നാൽ രാവിലെ തെരച്ചിൽ സംഘങ്ങളിലെ പലർക്കും പ്രഭാതഭക്ഷണം ഉൾപ്പെടെ ലഭിച്ചില്ലെന്ന പരാതി ഉയർന്നു. പൊലീസുകാർക്കും സന്നദ്ധപ്രവർത്തകർക്കുമാണ് പട്ടിണിയിരിക്കേണ്ടി വന്നത്. വിഷയം മാദ്ധ്യമങ്ങൾ ചൂണ്ടിക്കാട്ടിയതോടെ പരാതി ഉയർന്ന ഭാഗത്ത് എത്രയും വേഗം ഭക്ഷണം വിതരണം ചെയ്യുമെന്ന മറുപടിയാണ് മന്ത്രി കെ രാജൻ നൽകിയത്.

അതിനിടെ വിതരണം ചെയ്ത ബ്രഡ്ഡും ബണ്ണും മോശമായിരുന്നെന്നും കാലാവധി കഴിഞ്ഞതാണെന്നുമുളള പരാതിയും ഉയർന്നു. ദുരന്തമുഖമായതുകൊണ്ടു തന്നെ ആരും പ്രത്യക്ഷമായി പരാതിപ്പെടാൻ തയ്യാറായില്ല. എന്നാൽ ബ്രഡ്ഡിന്റെയും ബണ്ണിന്റെയും ദൃശ്യങ്ങൾ ചില വാർത്താചാനലുകൾ പുറത്തുവിട്ടു.
തുടക്കം മുതൽ സൗജന്യമായി ഭക്ഷണം ഉണ്ടാക്കി നിരവധി പേർ ദുരന്തഭൂമിയിൽ രക്ഷാപ്രവർത്തകർക്ക് എത്തിച്ചിരുന്നു. എന്നാൽ പലപ്പോഴും ഇവരെ പൊലീസുകാർ ഉദ്യോഗസ്ഥരുടെ നിർദ്ദേശപ്രകാരം തടയുന്ന സ്ഥിതിയുണ്ടായി.

 

യൂത്ത് ലീഗിന്റെ നേതൃത്വത്തിലുളള വൈറ്റ് ഗാർഡ് നിരവധി പേർക്ക് മൂന്ന്് നേരവും ഭക്ഷണം സൗജന്യമായി നൽകിയിരുന്നു. സേവാഭാരതി ഉൾപ്പെടെയുളള സംഘടനകളുമായി ബന്ധപ്പെട്ടവരും രക്ഷാപ്രവർത്തകർക്ക് ആദ്യ ദിനങ്ങളിൽ ഭക്ഷണപൊതി തയ്യാറാക്കിയിരുന്നു. എന്നാൽ സർക്കാർ ഭക്ഷണവിതരണം വിലക്കിയത് മാദ്ധ്യമങ്ങളിലൂടെ പുറത്തുവന്നതോടെ എല്ലാവരും പിൻമാറി. പലരും വേദനയോടെ ഇക്കാര്യം സമൂഹമാദ്ധ്യമങ്ങളിൽ പങ്കുവയ്‌ക്കുകയും ചെയ്തു.

ചൂരൽമലയിൽ ഉൾപ്പെടെ 85 ദുരിതാശ്വാസ ക്യാമ്പുകളിലായി 2586 കുടുംബങ്ങളിലെ 8908 പേരെയാണ് പ്രദേശത്ത് മാറ്റി താമസിപ്പിച്ചത്. മേപ്പാടി ഗവ. പോളിടെക്‌നിക്കിലെ സമൂഹ അടുക്കളയിൽ നിന്ന് ദുരന്തമേഖലയിലെ രക്ഷാപ്രവർത്തകർക്ക് പൂർണമായി ഭക്ഷണം എത്തിക്കാമെന്ന് ആയിരുന്നു സർക്കാർ നിലപാട്. പതിനായിരം ഭക്ഷണപൊതികൾ വരെ ദിവസവും ഇവിടെ നിന്ന് നൽകാൻ കഴിയുമെന്നാണ് അവകാശപ്പെട്ടിരുന്നത്.

രാഷ്‌ട്രീയ വ്യത്യാസം നോക്കാതെയാണ് പലരും സൗജന്യമായി ഭക്ഷണം വിതരണം ചെയ്തിരുന്നത്. അതുകൊണ്ടു തന്നെ സർക്കാർ നിലപാട് വ്യാപക പ്രതിഷേധം ക്ഷണിച്ചുവരുത്തിയിരുന്നു. മന്ത്രി മുഹമ്മദ് റിയാസിന്റെ നേതൃത്വത്തിലാണ് ഭക്ഷണം വിതരണം ചെയ്യുന്നത് കർശനമായി വിലക്കണമെന്ന നിലപാട് സ്വീകരിച്ചതെന്നാണ് ജനം ടിവി റിപ്പോർട്ട് ചെയ്യുന്നത് ഭക്ഷണം ആവശ്യമുണ്ട് എന്ന് പറഞ്ഞ് നാട്ടിലാകെ പണം പിരിച്ച് അതിന്റെ ഭാഗമായ ഒരു നിലപാട് സ്വീകരിച്ചാൽ ആര് ഉത്തരം പറയുമെന്നായിരുന്നു മാദ്ധ്യമങ്ങളോട് മന്ത്രിയുടെ ചോദ്യം.