NEET UG-2025: അപേക്ഷ സമയം ഇന്ന് അവസാനിക്കും
March 7, 2025തിരുവനന്തപുരം: രാജ്യത്തെ മെഡിക്കൽ പ്രവേശനത്തിനുള്ള അഖിലേന്ത്യാ പ്രവേശന പരീക്ഷയായ NEET-UG ക്ക് അപേക്ഷിക്കാനുള്ള സമയപരിധി ഇന്ന് അവസാനിക്കും. അപേക്ഷ ഇന്നു രാത്രി 11.50 വരെ നൽകാം. അപേക്ഷയിൽ തിരുത്തലുകൾ വരുത്തുന്നതിനുള്ള സമയം മാർച്ച് 9 മുതൽ 11 വരെയാണ്. മേയ് 4നാണ് പരീക്ഷ നടക്കുക. ഉച്ചയ്ക്ക് 2 മുതൽ വൈകുന്നേരം 5 വരെയാണ് പരീക്ഷ സമയം. അഡ്മിറ്റ് കാർഡുകൾ മെയ് ഒന്നിന് പ്രസിദ്ധീകരിക്കും. എംബിബിഎസ്, ബിഡിഎസ്, ആയുഷ്, വെറ്ററിനറി, നഴ്സിങ്, ലൈഫ് സയൻസസ് പ്രോഗ്രാമുകളിലേക്കുള്ള പ്രവേശനത്തിനായുള്ള ദേശീയതല പ്രവേശന പരീക്ഷയാണ് നീറ്റ് യു.ജി.
വെറ്ററിനറി സയൻസ് ബാച്ലർ ബിരുദത്തിനുള്ള 2025ലെ 15% ഓൾ ഇന്ത്യ ക്വോട്ട സീറ്റുകളിലേക്കുള്ള പ്രവേശനം ഈ വർഷം നീറ്റ് യുജി റാങ്കിന്റെ അടിസ്ഥാനത്തിലാണ്. ഇതുവരെ അപേക്ഷിക്കാത്തവർക്ക് ഔദ്യോഗിക വെബ്സൈറ്റായ http://neet.nta.nic.in ൽ അപേക്ഷിക്കാം. ജനറൽ വിഭാഗത്തിലെ വിദ്യാർത്ഥികൾ 1,700 രൂപയും OBC-NCL, ജനറൽ-EWS വിഭാഗങ്ങളിലെ അപേക്ഷകർ 1,600 രൂപയും അടയ്ക്കണം. SC, ST, PwBD, മൂന്നാം ലിംഗ വിദ്യാർത്ഥികൾക്ക് അപേക്ഷാ ഫീസ് 1,000 രൂപയാണ്. ഇന്ത്യയ്ക്ക് പുറത്തുള്ള പരീക്ഷാ കേന്ദ്രങ്ങൾക്ക് 9,500 രൂപ നൽകണം.
