ഇന്ത്യയും അമേരിക്കയും 300 കോടി ഡോളറിന്റെ പ്രതിരോധ കരാറില്‍ ഒപ്പുവെച്ചു
February 25, 2020ഡല്‍ഹി: ഇന്ത്യയും യു.എസും 300കോടി ഡോളറിന്റെ പ്രതിരോധ കരാറില്‍ ഒപ്പുവെച്ചു. ഇന്ത്യയുമായുള്ള പ്രതിരോധ സഹകരണം വിപുലമാക്കുമെന്നും ഇന്ത്യ യു.എസില്‍ നിന്ന് 22000കോടി രൂപയുടെ അത്യാധുനിക സൈനിക ഉപകരണങ്ങള്‍ വാങ്ങുമെന്നും ഹൈദരാബാദ് ഹൗസിലെ കൂടിക്കാഴ്ചക്ക് ശേഷം സംയുക്തപ്രസ്താവനയില്‍ ഡോണള്‍ഡ് ട്രംപ് പറഞ്ഞു.
വൈദ്യശാസ്ത്ര ഉപകരണങ്ങളുടെ ഗുണമേന്മ ഉറപ്പാക്കുന്നതിന് ഇരു രാജ്യങ്ങളും സഹകരിക്കും. പ്രകൃതി വാതക നീക്കത്തിന് ഐഒസിഎക്‌സോണ്‍മൊബില്‍ കരാറിലും ധാരണയായി. ഇരു രാജ്യങ്ങളും ഭീകരവാദത്തിനെതിരെ നിലകൊള്ളുമെന്നും ഡോണള്‍ഡ് ട്രംപ് അറിയിച്ചു. അപാച്ചെ-എം. എച്ച്‌ 60 റോമിയോ ഹെലികോപ്റ്റര്‍ ഉള്‍പ്പെടെ ഇന്ത്യ യു.എസില്‍ നിന്ന് വാങ്ങും. ഇത് ഇരു രാജ്യങ്ങളുടേയും സംയുക്ത സൈനിക ശക്തി വര്‍ധിപ്പിക്കുമെന്നും ട്രംപ് അഭിപ്രായപ്പെട്ടു. നേരത്തേ ഇരു രാജ്യങ്ങളും തമ്മില്‍ ഇതു സംബന്ധിച്ച്‌ ധാരണയായ കരാര്‍ ചൊവാഴ്ച ഒപ്പുവെക്കുകയായിരുന്നു.
