കണ്ണൂർ താണയിൽ വൻ തീപിടിത്തം
September 27, 2021കണ്ണൂർ: കണ്ണൂരിൽ തീപ്പിടിത്തം. ദേശീയ പാതയിൽ താണയിലുള്ള ഗ്രെയിസ് മോട്ടോഴ്സ് എന്ന സ്ഥാപനത്തിനാണ് തീപിടിച്ചത്. ഇരുനില കെട്ടിടമാണിത്.ഒന്നാംനിലയിലെ ഏഴ് കടമുറികൾ കത്തിയമർന്നു. ഈ കടമുറികളിലൊന്നും സ്ഥാപനങ്ങൾ പ്രവർത്തിച്ചിരുന്നില്ല. കണ്ണൂർ, തലശ്ശേരി, മട്ടന്നൂർ എന്നിവിടങ്ങളിൽ നിന്നുള്ള അഗ്നിശമന സേന സ്ഥലത്തെത്തി ഏറെ പ്രയാസപ്പെട്ടാണ് തീയണച്ചത്.
ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം. അഗ്നിബാധയെ തുടർന്നുണ്ടായ വൻ പുകപടലം അന്തരീക്ഷത്തിൽ ഏറെ നിലനിന്നത് ഭീതിപടർത്തി. തീപടർന്നത് ഒഴിഞ്ഞ കടകളിലേക്കായതിനാൽ കൂടുതൽ ദുരന്തം ഒഴിവായി. ഏകദേശം 40 ലക്ഷം രൂപയോളം നഷ്ടമുണ്ടായതായാണ് പ്രാഥമിക വിലയിരുത്തലെന്ന് അഗ്നിശമനസേന അധികൃതർ അറിയിച്ചു.