സ്വപ്നയെ കാണുന്നതിന് മുൻപ് ഷാജ് കിരൺ 4 മണിക്കൂർ ഉന്നത പൊലീസ് ഉദ്യോഗസ്ഥനൊപ്പമെന്ന് രഹസ്യവിവരം ! സ്വപ്‌ന ശബ്ദരേഖ പുറത്തുവിട്ടതിന് പിന്നാലെ മുങ്ങാൻ ഒത്താശ ചെയ്തതും പൊലീസ് ഉന്നതർ !

നയതന്ത്ര പാഴ്സൽ സ്വർണക്കടത്തു കേസ് പ്രതി സ്വപ്ന സുരേഷിനെ സന്ദർശിക്കാൻ പാലക്കാട് എത്തും മുൻപു വിവാദ ബ്രോക്കർ ഷാജ് കിരൺ 4 മണിക്കൂർ സമയം ഉന്നത പൊലീസ് ഉദ്യോഗസ്ഥനൊപ്പം കൊച്ചിയിൽ ചെലവഴിച്ചതായി രഹസ്യവിവരം. കേരളാ പൊലീസ് സ്പെഷൽ ബ്രാഞ്ച് തന്നെ ഇക്കാര്യം മേലധികാരികൾക്കു റിപ്പോർട്ട് ചെയ്തിട്ടുണ്ട്. പാലക്കാട്ടേക്ക് ഷാജ് എത്തിയത് സ്വപ്നയെ സ്വാധീനിച്ചു വലയിലാക്കുക എന്ന കൃത്യമായ ഉദ്ദേശ്യത്തോടെയാണ് എന്നാണ് വെളിവാകുന്ന വിവരം.

മജിസ്ട്രേട്ട് കോടതിയിൽ രഹസ്യമൊഴി നൽകിയ ശേഷം മാധ്യമപ്രവർത്തകരുടെ ചോദ്യങ്ങൾക്കു മറുപടി പറഞ്ഞ സ്വപ്ന സുരേഷിനെ ഫോണിൽ വിളിച്ച് അഭിനന്ദനം അറിയിച്ച ഷാജ് കിരണിന്റെ മനോഭാവം വളരെ പെട്ടന്നു മാറിയതായി സ്വപ്ന വെളിപ്പെടുത്തിയിരുന്നു. ഉന്നത പൊലീസ് ഉദ്യോഗസ്ഥന്റെ ഇടപെടലിനു ശേഷം അദ്ദേഹത്തിന്റെ ദൂതനായാണു ഷാജ് പാലക്കാട് എത്തിയതെന്നാണു നിഗമനം.