സ്വർണ്ണകടത്ത്‌ ; മാധ്യമപ്രവര്‍ത്തകരോടു ക്ഷുഭിതനായി മുഖ്യമന്ത്രി; എന്താണു നിങ്ങള്‍ക്കു വേണ്ടത്?
August 8, 2020
തിരുവനന്തപുരം: എന്താണു നിങ്ങളുടെ ഉദ്ദേശ്യമെന്നു മാധ്യമപ്രവര്‍ത്തകരോടു മുഖ്യമന്ത്രി പിണറായി വിജയന്‍. സ്വര്‍ണക്കടത്തു കേസില്‍ എന്‍ഐഎ കോടതിയില്‍ നടത്തിയ പരാമര്‍ശങ്ങള്‍ എന്ന പേരില്‍ ചില മാധ്യമങ്ങള്‍ തന്നെ അപകീര്‍ത്തിപ്പെടുത്താന്‍ ശ്രമിക്കുന്നു എന്നു പറഞ്ഞ് മുഖ്യമന്ത്രി ക്ഷുഭിതനായി. മാധ്യമധര്‍മം പാലിക്കണമെന്നും മുഖ്യമന്ത്രി മാധ്യമപ്രവര്‍ത്തകരോടു പറഞ്ഞു. മുഖ്യമന്ത്രി സ്വര്‍ണക്കടത്തിനു കൂട്ടു നിന്നു എന്നാണോ മാധ്യമങ്ങള്‍ക്കു വരുത്തിത്തീര്‍ക്കേണ്ടതെന്നു മുഖ്യമന്ത്രി ചോദിച്ചു. എത്ര ശ്രമിച്ചാലും അതു നടക്കില്ല. നാട്ടുകാര്‍ക്ക് ഒരു സംശയവുമുണ്ടാകുകയുമില്ല. എന്തു തെളിവിന്‍റെ അടിസ്ഥാനത്തിലാണ് ഇത്തരം പ്രചാരണങ്ങള്‍ നടത്തുന്നത്? നിങ്ങള്‍ ഒരു പ്രത്യേക ഉപജാപക സംഘത്തിന്‍റെ വക്താക്കളായി മാറുകയല്ലേ എന്നും മുഖ്യമന്ത്രി ചോദിച്ചു. തന്നെയും ഓഫീസിനെയും അപകീര്‍ത്തിപ്പെടുത്തുന്ന രീതിയിലാണ് വാര്‍ത്തകള്‍ കൊടുക്കുന്നതെന്നായിരുന്നു മുഖ്യമന്ത്രിയുടെ ആക്ഷേപം.
